Samstarfsaðilar ÍSÍ, sem starfa undir heitinu Ólympíufjölskylda ÍSÍ, styðja við bakið á starfsemi ÍSÍ með ýmsum hætti á hverri Ólympíuöðu. Sá stuðningur er ÍSÍ afar mikilvægur og gerir sambandinu mögulegt að bæta umgjörð ýmissa verkefna sem haldið er úti af hálfu ÍSÍ. Ólympíufjölskyldan styður meðal annars við viðburð ÍSÍ þar sem íþróttafólk, sem sérsambönd ÍSÍ hafa kjörið íþróttafólk ársins í viðkomandi sérgrein, veitir viðtöku verðlaunagripum í þeim tilgangi. Ólympíufjölskyldan gefur glæsilega verðlaunagripi sem eru eignargripir þeirra sem hljóta.

Á viðburði ÍSÍ síðastliðinn föstudag, þar sem fram fór afhending viðurkenninga til íþróttafólks ársins 2021 var fyrirtækjunum í Ólympíufjölskyldu ÍSÍ síðustu Ólympíuöðu veittur þakklætisvottur. Fengu þau öll innrammað veggspjald, sem gefið var út af skipuleggjendum Vetrarólympíuleikanna í Peking í febrúar sl., áritað af öllum íslenska hópnum sem þátt tók í leikunum.

Andri Stefánsson framkvæmdastjóri afhenti fulltrúum fyrirtækjanna veggspjöldin að viðstöddu íþróttafólkinu og gestum.

Á meðfylgjandi mynd eru Kristinn G. Bjarnason framkvæmdastjóri sölu- og markaðssviðs Toyota á Íslandi, Elín Þórunn Eiríksdóttir framkvæmdastjóri tjóna hjá Sjóvá, Sylvía Kristín Ólafsdóttir framkvæmdastjóri þjónustu- og markaðsmála hjá Icelandair, Halldóra María Einarsdóttir markaðsstjóri Íslenskrar getspár og Iða Brá Benediktsdóttir framkvæmdastjóri viðskiptabankasviðs og aðstoðarbankastjóri Arion banka.