Gott ársþing UMSS
14.03.2016Ungmennasamband Skagafjarðar hélt 96. ársþing sitt í húsnæði veitingahússins Gott í gogginn á Sauðárkróki sunnudaginn 13. mars síðastliðinn. Þingið var að þessu sinni í boði Siglingaklúbbsins Drangeyjar. Þingið var ágætlega sótt, alls voru 36 fulltrúar mættir af 58. Nýtt hestamannafélag, Hestamannafélagið Skagfirðingur fékk inngöngu í UMSS en þetta nýja félag er í raun sameinað félag hestamannafélaganna þriggja sem voru innan UMSS, Stíganda, Svaða og Léttfeta. Þingið var starfsamt og var því jafnframt stjórnað af mikilli röggsemi af Gunnari Sigurðssyni þingforseta. Fjöldi tillagna lá fyrir þinginu og voru þær flestar samþykktar m.a. tillaga um að hið nýja hestamannafélag tæki yfir réttindi og skyldur hestaíþróttaráðs UMSS sem þar með var lagt niður. Þórhildur Sylvía Magnúsdóttir var áfram kjörin formaður sambandsins. Fulltrúi ÍSÍ á þinginu var Viðar Sigurjónsson Skrifstofustjóri ÍSÍ á Akureyri. Á myndinni eru frá vinstri Steinunn Rósa Guðmundsdóttir fyrrum gjaldkeri UMSS, Þórhildur Sylvía Magnúsdóttir formaður UMSS og Gunnar Sigurðsson þingforseti.