Sigurður Hauksson hefur verið ráðinn framkvæmdastjóri Skíðasambands Íslands. Hann tekur strax til starfa. Jónas Egilsson, fráfarandi framkvæmdastjóri, gerði samkomulag við SKÍ um starfslok nú á dögunum og mun hann vinna með Sigurði og vera honum til aðstoðar fram eftir sumri.

Þetta kemur fram á heimasíðu Skíðasambands Íslands. Þar segir einnig:

Á þessum tímamótum vill Skíðasamband Íslands þakka Jónasi Egilssyni fyrir gott og traust samstarf á liðnum árum og ósk um velgengni á nýjum vettvangi framundan. Jónas tók við sem framkvæmdastjóri á umrótstíma í lok Covid og hefur leyst sín verkefni af kostgæfni. Sigurður Hauksson er mörgum kunnugur innan skíðahreyfingarinnar sem fyrrum keppnismaður í alpagreinum. Hann útskrifaðist árið 2015 sem stúdent frá NTG skíðamenntaskólanum í Bærum í Noregi og lauk B.s. í viðskiptafræði frá skíðaháskólanum Colorado Mountain College árið 2019. Fyrir utan tilfallandi störf í Noregi og USA þá var Sigurður framkvæmdastjóri Skíðasvæðis Tindastóls á Sauðárkróki árin 2020 – 2025.