Um liðna helgi fóru Íslandsleikarnir fram í annað sinn og nú á Selfossi. Um er að ræða íþróttamót og opnar æfingar fyrir börn og ungmenni með fatlanir og þau sem ekki hafa fundið sig í hefðbundnu íþróttastarfi. Á leikunum fengu þátttakendur að taka þátt í opnum æfingum í frjálsum, fimleikum, handbolta, fótbolta og körfubolta og aðstoðuðu þjálfarar og ungmenni frá íþróttafélögum á Selfossi við skipulag og utanumhald æfinganna. 

Ýmislegt annað var á dagskrá um helgina eins og söngur og gleði á setningunni, pizzuveisla, sundlaugapartý og tónleikar VÆB bræðra. Þátttakendur voru rúmlega 70 og er óhætt að segja að mikil gleði hafi ríkt alla helgina. Gott dæmi um þá ánægju sem ríkti á mótinu kom frá móður sem gaf sig á tal við einn starfsmann mótsins og mátti til með að segja honum frá upplifun barnsins hennar sem sagði „þetta var svo skemmtilegt að þetta var eiginlega skemmtilegra en að vera í tölvunni“. Móðirin bætti við að meira hrós væri varla til í huga barnsins.  

Íslandsleikarnir eru  liður í verkefninu Allir með! sem er samstarfsverkefni ÍF, UMFÍ og ÍSÍ. Verkefnastjóri verkefnisins er Valdimar Gunnarsson en mótsstjóri á mótinu var Rakel Magnúsdóttir.

Fjölmiðlar gerðu mótinu góð skil og hér eru hlekkir á fréttir frá RÚV og Stöð2. 

Myndir með fréttinni tók Magnús Orri Arnarsson