Allir með leikarnir verða haldnir laugardaginn 9. nóvember, og verða þeir bæði í Laugardalshöllinni og fimleikasal Ármanns. Öll börn með fatlanir eru velkomin á leikana. 

Allir með leikarnir er hluti af verkefninu Allir með sem gengur út á að fjölga tækifærum fyrir börn með fatlanir í íþróttum. Markmið með leikunum er að kynna íþróttir fyrir þessum hópi og um leið að gera verkefnið sýnilegra í samfélaginu.

Íþróttaálfurinn mætir á svæðið. Allir þátttakendur fá brúsa merktan leikunum og boðið verður upp á pitsuveislu í hádeginu þar sem einnig verða kynningar á öðrum íþróttagreinum. Deginum lýkur svo með dúndrandi diskói.

Öll fjölskyldan er velkomin með.
Þátttökugjald á leikana er 1.500 kr, og skráning fer fram á heimasíðu Allir með.

Leikarnir eru samstarfsverkefni og þeir aðilar sem koma að framkvæmd þeirra eru: Íþrótta- og Ólympíusamband Íslands, Ungmennafélag Íslands, Knattspyrnusamband Íslands, Handknattleikssamband Íslands, Körfuknattleikssamband Íslands, Fimleikasamband Íslands, Frjálsíþróttasamband Íslands og Íþróttasamband fatlaðra.