Rússum og Hvít-Rússum meinuð þátttaka í EYOWF í Vuokatti
![](/library/Myndir/Afreks--og-olympiusvid/Logo/eyoff_2022_med_ramma.jpg?proc=400x400)
Evrópusamband Ólympíunefnda (EOC) hefur tilkynnt að Rússar og Hvít-Rússar muni ekki verða meðal keppenda og starfsfólks Vetrarólympíuhátíðar Evrópuæskunnar sem fram fer í Vuokatti í Finnlandi síðar í marsmánuði.
Í fréttatilkynningu frá EOC kemur fram að ákvörðunin hafi verið erfið, með hliðsjón af því hversu ungir keppendur hátíðarinnar eru, en að sambandið sjái ekki aðra leið í málinu. Fram kemur að EOC styðji heilshugar íþróttafólk sem og almenning í Úkraínu.
ÍSÍ áætlar að fara með ríflega 20 keppendur á hátíðina sem hefst 20. mars nk. Ísland mun eiga keppendur í eftirfarandi íþróttum: alpagreinum, gönguskíðum, snjóbrettum og listskautum.
Fréttatilkynningu EOC í heild sinni er að finna á heimasíðu EOC.