Íþróttamaður UMSE 2021 var kynntur þann 27. janúar síðastliðinn. Vegna fjöldatakmarkana fór viðburðurinn fram í beinni útsendingu á Facebook, líkt og í fyrra. Titilinn hlaut að þessu sinni Guðmundur Smári Daníelsson frjálsíþróttamaður frá Umf. Samherjum. Guðmundur Smári hefur lengi æft og keppt af miklum dugnaði í frjálsíþróttum. Árið 2018 fékk hann íþrótta- og skólastyrk við Queen University of Charlotte í Norður Karólínu í Bandaríkjunum. Í upphafi lagði Guðmundur Smári áherslu á tugþraut en hefur snúið sér alfarið að spjót- og sleggjukasti. Þrátt fyrir að miklar hömlur hafi verið á árinu vegna COVID-19, þá átti Guðmundur Smári gott ár á keppnisvellinum. Hann var valinn í ALL Region utanhúss í sleggjukasti og spjótkasti. Til þess að komast í það val þá þarf árangurinn að vera einn af fimm bestu í öllum suðausturhluta Bandaríkjanna.

ÍSÍ óskar Guðmundi Smára innilega til hamingju með titilinn.

Mynd: samsett úr myndum frá Guðmundi Smára.