Setningarhátíð þriðju vetrarólympíuleika ungmenna fór fram fyrr í kvöld í Lausanne í Sviss. Fánaberi við setningarhátíðina var Aðalbjörg Lillý Hauksdóttir keppandi í alpagreinum. Setningarathöfnin fór fram í Vaudoise skautahöllinni í Lausanne. Í mannvirkinu fer fram keppni í íshokkíi á leikunum. Mikið var um dýrðir við setninguna, með fréttinni má sjá nokkrar svipmyndir frá setningarhátíðinni.

Keppni á leikunum hefst á morgun. Þá munu þau Aðalbjörg Lillý og Gauti Guðmundsson keppa í risasvigi. Keppnin fer fram á Les Diablerets skíðasvæðinu. Keppni stúlkna fer fram kl. 09:15-10.30 og drengja kl. 12.30-13.30 að íslenskum tíma. Í keppni í risasvigi er ein umferð, rásnúmer Aðalbjargar er 39 og Gauta 61. Ein mínúta er á milli þess sem keppendur eru ræstir af stað.