Búið er að úthluta styrkjum úr Ferðasjóði íþróttafélaga til íþrótta- og ungmennafélaga, vegna keppnisferða innanlands á fyrirfram skilgreind styrkhæf mót ársins 2016. Til úthlutunar að þessu sinni voru 97 milljónir króna. Styrkirnir voru greiddir beint til félaga og deilda 3. mars sl. en hér fyrir neðan má sjá samantekt á skiptingunni pr. íþróttahérað. Afar mismunandi er hversu mörg félög eiga aðild að hverju héraði og hversu mörg félög innan hvers héraðs sækja um styrki úr sjóðnum. 

Þau félög sem sóttu um styrk geta nú farið inn í umsókn sína í gegnum vefslóðina sem fylgdi stofnun umsóknarinnar og séð úthlutun styrkja pr. ferð.

Að þessu sinni bárust sjóðnum 246 umsóknir frá 120 félögum úr 22 íþróttahéruðum vegna 3.252 keppnisferða. Heildarupphæð umsókna var kr. 464.725.850,- og er þá eingöngu um beinan ferðakostnað að ræða, ekki gistingu og uppihald. 

Á Fjárlögum Alþingis er gert ráð fyrir 130 milljónum króna í Ferðasjóð íþróttafélaga vegna keppnisferða ársins 2017. Framlag ríkisins til sjóðsins skiptir íþróttahreyfinguna gríðarlega miklu máli enda ferðakostnaður íþróttahreyfingarinnar stór þáttur í rekstri flestra íþróttafélaga, ekki síst á landsbyggðinni. Með styrkjum úr sjóðnum hefur aðgengi íþróttafólks að keppni og íþróttamótum verið jafnað umtalsvert.