Forseti Íslands, Guðni Th. Jóhannesson, setti ráðstefnuna Aldrei of seint – Heilsuefling eldri aldurshópa í gærdag og fór hún fram við fjölmenni í Tjarnarsal Ráðhúss Reykjavíkur. Um 250 ráðstefnugestir fylltu öll sæti í salnum og hlýddu á fjölda fræðandi fyrirlestra um heilsueflingu aldraðra ásamt hressandi hléæfingum milli efnishluta og góðri næringu í boði Björnsbakarí og Mjólkursamsölunnar.

Ráðstefnan er samstarf ÍSÍ, Öldrunarráðs Íslands, Landsambands eldri borgara, Félags eldri borgara í Reykjavík og nágrenni og Félags áhugafólks um íþróttir aldraðra. Heppnaðist hún einstaklega vel og ljóst að mikill áhugi er á þessum umræðuefni meðal áhugafólks um málefnið og almennings.

Myndir frá ráðstefnunni eru komnar inn á myndasafni ÍSÍ. Ráðstefnan var tekin upp og verður gerð aðgengileg von bráðar.