Fimleikakonan Irina Sazonova úr Ármanni tryggði sér þátttökurétt á Ólympíuleikunum í Ríó á úrtökumóti sem fram fór í sömu borg um helgina. Irina sem varð í 39. sæti á úrtökumótinu með 52.931 stig er þar með fyrsta íslenska konan sem öðlast hefur keppnisrétt á Ólympíuleikum í fimleikum. Ólympíuleikarnir í Ríó verða settir föstudaginn 5. ágúst. Keppni í fjölþraut kvenna í fimleikum fer fram miðvikudaginn 7. ágúst.

Nú þegar rétt rúmir þrír mánuðir eru í að leikarnir verði settir hafa auk Irinu sundmennirnir Anton Sveinn Mckee, Eygló Ósk Gústafsdóttir og Hrafnhildur Lúthersdóttir náð lágmörkum. Einnig hafa frjálsíþróttakonurnar Anita Hinriksdóttir og Ásdís Hjálmsdóttir náð tilskyldum lágmörkum. Komandi dagar og vikur skera úr um hverjir til viðbótar tryggja sér þátttökurétt á leikunum.