ÍSÍ er með Instagram síðu, @isiiceland, þar sem leitast er við að koma á framfæri því góða starfi sem fram fer í íþróttahreyfingunni. Nú stendur til að beina sjónum að íslensku afreksíþróttafólki og leyfa fólkinu í landinu að fá innsýn í þeirra daglega líf. Nú mun íslenskt íþróttafólk skiptast á að taka við Instagram síðu ÍSÍ og sýna okkur hinum hvernig dagur í lífi þess er með því að hlaða inn myndum og myndböndum á Instagram Stories. Þeir sem vilja fylgjast með íslensku afreksíþróttafólki æfa, keppa og takast á við hversdagsleikann geta fylgt Instagram síðu ÍSÍ og fengið upplifunina beint í símann.

Arnar Davíð Jónsson – Nýkrýndur sigurvegari Evrópumótaraðarinnar í keilu – 15. nóvember
Afreksíþróttamaðurinn sem ætlar að leyfa okkur að fylgjast með degi í sínu lífi þann 15. nóvember nk. er Arnar Davíð Jónsson, nýkrýndur sigurvegari Evrópumótaraðarinnar í keilu. Aldrei áður hefur Íslendingur sigrað Evrópumótaröðina í keilu og er því um sögulegan sigur að ræða. Helgina fyrir þann glæsilega árangur keppti Arnar Davíð í Kúveit þar sem hann náði 2. sæti í World Bowling Tour, sem er risa­stórt skref fyr­ir keiluíþrótt­ina á Íslandi. Arnar Davíð hefur tvisvar sinnum verið kjörinn keilumaður ársins hjá Keilusambandi Íslands, árin 2016 og 2018. Árið 2018 náði hann þeim merka áfanga að vera fyrstur íslenskra keilara til að vinna mót á evrópsku mótaröðinni í keilu þegar að hann vann Alþjóðlega Óðinsvé mótið og stendur nú árið 2019 uppi sem sigurvegari á Evrópumótaröðinni. Sannarlega glæsileg frammistaða hjá Arnari upp á síðkastið og verður spennandi að fylgjast með því hvernig dagur í lífi hans er.

ÍSÍ hvetur þig til þess að fylgja Instagram síðu ÍSÍ og fylgjast með þínum uppáhalds fyrirmyndum í íþróttum takast á við hversdagslífið.