Á hverju ári er 8. nóvember haldinn hátíðlegur því sá dagur er tileinkaður baráttunni gegn einelti. Dagurinn hefur verið kallaður „Dagur gegn einelti” en markmið hans er að minna okkur á mikilvægi þess að sporna við og stoppa einelti þegar við verðum þess vör, en einnig að efna til umræðu, fræðslu og viðburða og hvetja til jákvæðra samskipta og efla vináttu.

Á föstudagsmorgun bauð Heimili og skóli til athafnar í Tækniskólanum í Sjómannahúsinu og var aðaltilefnið afhending hvatningarverðlauna til þess einstaklings eða hóps sem þótti hafa borið af í baráttunni gegn einelti. Skólameistari Tækniskólans Hildur Ingvarsdóttir stýrði dagskrá, en ávörp fluttu Ásmundur Einar Daðason, mennta- og barnamálaráðherra, Sigurður Sigurðsson framkvæmdastjóri Heimilis og skóla, Sigrún Garcia Thorarensen, formaður fagráðs eineltismála og Ali Mukhtar Ahmed nemandi á íslenskubraut Tækniskólans. Fjölmargar tilnefningar bárust en það var Freyja Rós Haraldsdóttir, kennari við Menntaskólann á Laugarvatni sem hlaut verðlaunin að þessu sinni. Henni var þakkað vel fyrir hennar framlag til baráttunnar gegn einelti.

Íþrótta- og Ólympíusamband Íslands (ÍSÍ) er aðili að þjóðarsáttmála gegn einelti þar sem allir eru hvattir til að leggja sitt af mörkum til að einelti fái ekki þrifist í samfélaginu. ÍSÍ hvetur alla, jafnt í íþróttahreyfingunni sem og annars staðar, til að vanda til verka og hjálpast að við að koma í veg fyrir eða stoppa einelti, verði þeir þess varir.

ÍSÍ bendir sambandsaðilum og íþrótta- og ungmennafélögum innan þeirra vébanda á samræmda viðbragðsáætlun fyrir íþrótta- og æskulýðsstarf þar sem finna má greinargóðar upplýsingar varðandi málaflokkinn og þá ekki síst hvernig bregðast skal við tilkynningum er varða samskiptavanda eða einelti.

Þú getur nálgast viðbragðsáætlunina hér!