Íþróttafélagið Nes, íþróttafélag fatlaðra á Suðurnesjum fékk endurnýjun viðurkenningar félagsins sem Fyrirmyndarfélag ÍSÍ í íþróttahúsi Heiðarskóla miðvikudaginn 20. október síðastliðinn.  Þar stóð yfir æfing í boccia með yfirþjálfaranum Petrínu Sigurðardóttur sem einnig er stjórnarmaður í félaginu.  Það var Þórarinn Alvar Þórarinsson verkefnastjóri á Þróunar- og fræðslusviði ÍSÍ sem afhenti Petrínu viðurkenninguna. Á myndinni er Petrína með viðurkenninguna ásamt fjölmörgum iðkendum á boccia æfingunni.

Ragnar Birkir Bjarkarson formaður félagsins var ánægður með viðurkenninguna og telur hana hafa margvísleg jákvæð áhrif á starfsemi félagsins. 

„Ávinningurinn af því að vera Fyrirmyndarfélag er ekki einungis fjárhagslegur heldur er líklega einn stærsti kosturinn sá að með því er ákveðin vottun gefin um gæði Íþróttafélagsins.  Foreldrar munu væntanlega frekar vilja senda börn sín til Fyrirmyndarfélaga.  Þetta er einnig mikil hvatning til að halda áfram, þroskast sem íþróttafélag og vilja bæta starf okkar og gera enn betur.  Ávinningurinn er þá alltaf betra starf sem og betri og sterkari ímynd fyrir félagið okkar“.