Beint á efnisyfirlit síðunnar

Á döfinni

15

Skautakona ársins 2013

28.12.2013Annað árið í röð er Vala Rún valin Skautakona ársins. Vala Rún keppir í listhlaupi á skautum fyrir hönd Skautafélags Reykjavíkur og er glæsilegur fulltrúi íþróttarinnar.

Vala Rún er á sínu öðru ári í Unglingaflokki A (Junior) og hefur náð glæsilegum árangri bæði hér heima og erlendis, þar sem hún meðal annars náði besta árangri sem íslenskur keppandi hefur náð í Junior keppnisflokki á Norðurlandamóti er hún lenti í 14. sæti.

Vala Rún er bæði Bikarmeistari og Íslandsmeistari eftir að hafa unnið öll listhlaupamót á haustönn ársins. Hún hafnaði í fyrsta sæti bæði á RIG 2013 í Unglingaflokki A (Junior) og Vetrarmóti sambandsins í febrúar.

Hún keppti fyrir Íslands hönd á Coupe Du Printempts í Luxembourg í mars síðastliðnum og náði þar 17. sæti. Sömuleiðis keppti hún í annað skiptið á sínum ferli á Junior Grand Prix mótaröðinni og lenti í 25. sæti af 30 keppendum í Junior flokki, sem verður að teljast mjög gott fyrir íslenskan skautara.

Skautaíþróttin er ung að árum hér á landi en með glæsilegar fyrirmyndir eins og Völu Rún er framtíðin björt.

Myndir með frétt

Til baka