ÍÞRÓTTA- OG ÓLYMPÍUSAMBAND ÍSLANDS

Nú stendur yfir heilsu-og hvatningarverkefni ÍSÍ, Hjólað í vinnuna. Í tilefni af því var boðið uppá kaffitjöld frá 6:45 – 9:00 í morgun á fimm stöðum á höfuðborgarsvæðinu. Þátttakendum var boðið að hjóla við og þiggja ljúffengt kaffi frá Kaffitár og Egils Kristal frá Ölgerðinni. Reiðhjólaversluninn Örninn bauð upp á minniháttar lagfæringar á hjólum og aðilar frá Landssamtökum hjólreiðamanna, Íslenska Fjallahjólaklúbbnum, Hjólafærni og Hjólreiðafélaginu Bjarti voru á staðnum, aðstoðuðu við viðgerðir og kynntu sína starfssemi.

Um 1000 manns hjóluðu við og gæddu sér á kaffi og Kristal á meðan að hjólin voru yfirfarin. Þrátt fyrir kuldann lék veðrið við gesti, bjartviðri, logn og sól.

Hjólað í vinnuna stendur til 29. maí næst komandi og geta vinnustaðir, lið og liðsmenn en bæst í hópinn, en skráning fer fram á www.hjoladivinnuna.is

Á meðfylgjandi mynd má sjá fríðan hóp hjólreiðamanna í kaffitjaldinu á Geirsnefi.

Aðalstyrktaraðili Hjólað í vinnuna er Valitor en aðrir samstarfsaðilar eru: embætti landlæknis, umhverfissvið Reykjavíkurborgar, Fjölskyldu- og húsdýragarðurinn, Rás 2, Landssamtök hjólreiðamanna, Örninn, Advania, Kaffitár og Ölgerðin.

Nánari upplsýingar um Hjólað í vinnuna er að finna á www.hjoladivinnuna.is og eins veitir Jóna Hildur Bjarnadóttir, sviðsstjóri almenningsíþróttasviðs ÍSÍ, allar nánari upplýsingar í síma 514-4000 eða á netfangið jona@isi.is.